اسحاق ڈار کی اقتصادی سفارتکاری اور برآمدات کیلئے کوششیں تیز کرنے کی ہدایت

نائب وزیراعظم و وزیر خارجہ سینیٹر محمد اسحاق ڈار کی زیر صدارت ایک اعلا سطح کا اجلاس منعقد ہوا جس میں پاکستان کی اقتصادی سفارت کاری، عالمی سطح پر برآمدات کے فروغ اور بیرون ملک پاکستانی سفارتی مشنز کے فعال کردار کا تفصیلی جائزہ لیا گیا۔ اجلاس کے دوران اسحاق ڈار نے قومی اقتصادی ترجیحات کو تیزی سے آگے بڑھانے کے لیے وزارت خارجہ اور دیگر متعلقہ وزارتوں کے درمیان قریبی رابطہ کاری پر زور دیا۔ انہوں نے ہدایت کی کہ سفارتی سطح پر جاری کاوشوں کو عملی اور ٹھوس معاشی فوائد میں تبدیل کرنے کے لیے مسلسل مانیٹرنگ اور مؤثر حکمت عملی یقینی بنائی جائے تاکہ ملکی تجارتی اہداف حاصل کیے جا سکیں۔ اجلاس میں وزارت خارجہ کے سینئر حکام نے بھی شرکت کی اور اپنی پیشرفت سے آگاہ کیا۔