امریکا میں ویزا قوانین مزید سخت، ذیابیطس اور موٹاپے کے مریضوں پر داخلے کی پابندی کا امکان

واشنگٹن: امریکی حکومت نے ویزا پالیسی میں بڑی تبدیلی کرتے ہوئے ایسے غیر ملکیوں کے لیے امریکا میں داخلے کی شرائط سخت کر دی ہیں جو ذیابیطس، موٹاپے، دل کے امراض یا دیگر دائمی بیماریوں میں مبتلا ہیں۔

امریکی وزارتِ خارجہ کی جانب سے دنیا بھر میں موجود سفارت خانوں اور قونصل خانوں کو جاری نئی ہدایات میں کہا گیا ہے کہ اب ویزا افسران درخواست گزاروں کی صحت، عمر اور علاج کے متوقع اخراجات کو مدنظر رکھتے ہوئے فیصلہ کریں گے۔

رپورٹ کے مطابق، ہدایت نامے میں کہا گیا ہے کہ بعض بیماریوں جیسے دل، پھیپھڑوں، شوگر، سرطان اور ذہنی امراض کے علاج پر لاکھوں ڈالر خرچ ہوتے ہیں، اور ایسے افراد امریکا کے طبی نظام پر بوجھ بن سکتے ہیں۔

نئی پالیسی کے تحت ویزا افسران یہ بھی دیکھیں گے کہ آیا درخواست گزار اپنی زندگی بھر کے ممکنہ علاج کے اخراجات خود برداشت کرنے کے قابل ہے یا نہیں۔ اگر یہ ثابت نہ ہو سکا تو اس کی درخواست مالی بوجھ بننے کے خدشے پر مسترد کی جا سکتی ہے۔

ماہرین کے مطابق اگرچہ ویزا کے لیے طبی جانچ کا عمل پہلے سے موجود تھا، تاہم نئی ہدایات کے بعد بیماریوں کی فہرست میں نمایاں اضافہ کر دیا گیا ہے اور افسران کو صحت کی بنیاد پر ویزا مسترد کرنے کے زیادہ اختیارات دے دیے گئے ہیں۔

تجزیہ کاروں کا کہنا ہے کہ یہ اقدام امریکا کے امیگریشن قوانین میں ایک اہم اور متنازعہ تبدیلی ہے، جس سے خاص طور پر وہ افراد متاثر ہوں گے جو امریکا میں مستقل رہائش کے خواہاں ہیں۔