روس کے ساتھ جنگ بندی معاہدہ صرف 10 فیصد دور ہے، مگر اہم مسائل باقی ہیں: زیلنسکی

یوکرین کے صدر ولادیمیر زیلنسکی کا کہنا ہے کہ روس کے ساتھ جنگ بندی سے متعلق امن معاہدہ حتمی مرحلے کے قریب پہنچ چکا ہے اور فریقین کے درمیان معاہدہ صرف 10 فیصد دور رہ گیا ہے۔

نئے سال کے موقع پر قوم سے خطاب کرتے ہوئے صدر زیلنسکی نے کہا کہ امن معاہدہ 90 فیصد تک تیار ہے اور یوکرین بھی جنگ کے خاتمے کا خواہاں ہے، تاہم کسی بھی صورت میں یوکرین کی خودمختاری اور وجود پر سمجھوتہ نہیں کیا جائے گا۔

انہوں نے کہا کہ کسی بھی امن معاہدے کے لیے مضبوط سکیورٹی ضمانتیں ناگزیر ہیں تاکہ روس مستقبل میں دوبارہ حملے کی جرات نہ کر سکے۔
صدر زیلنسکی نے واضح کیا کہ اگرچہ پیش رفت ہوئی ہے لیکن سب سے اہم اور حساس معاملات اب بھی حل طلب ہیں۔

غیر ملکی میڈیا رپورٹس کے مطابق فریقین کے درمیان بنیادی اختلافات علاقائی کنٹرول کے معاملے پر موجود ہیں۔
روسی فوج اس وقت یوکرین کے تقریباً 20 فیصد حصے پر قابض ہے جبکہ روس معاہدے کے تحت یوکرین کے مشرقی علاقے ڈونباس پر مکمل کنٹرول چاہتا ہے، جو مذاکرات میں سب سے بڑی رکاوٹ بنا ہوا ہے۔