آزاد کشمیر الیکشن: کوٹلی میں 2 پریزائیڈنگ افسران معطل، گرفتار کر لیا گیا

آزاد کشمیر میں بلدیاتی و عمومی انتخابی عمل کے پہلے مرحلے کے دوران مبینہ دھاندلی کے الزامات پر الیکشن کمیشن نے فوری اور سخت ایکشن لیتے ہوئے 2 پریزائیڈنگ افسران کو معطل کر کے گرفتار کروا دیا ہے۔ ترجمان الیکشن کمیشن کے مطابق دونوں افسران مقررہ پولنگ اسٹیشن جانے کے بجائے ایک نجی رہائش گاہ منتقل ہو گئے تھے، جس کا علم ہوتے ہی ریٹرننگ افسر نے پولنگ بیگز کو فوری طور پر اپنی تحویل میں لے لیا اور دونوں ملزمان کو عہدوں سے معطل کر دیا گیا۔ الیکشن کمیشن کا کہنا ہے کہ انتخابی عمل کے تسلسل کو برقرار رکھنے کے لیے نئے پریزائیڈنگ افسران کی تعیناتی کر کے انہیں پولنگ اسٹیشنز پر روانہ کر دیا گیا ہے اور کسی بھی قسم کی غفلت یا بے ضابطگی کے خلاف انتخابی قوانین کے تحت سخت قانونی کارروائی کی جا رہی ہے۔

واضح رہے کہ اس واقعے کے بعد مسلم لیگ (ن) کے مرکزی رہنما رانا ثنا اللہ نے آزاد کشمیر کے حلقہ ایل اے 10 کوٹلی میں انتخابات کو معطل کرنے کا مطالبہ کیا تھا اور وزیراعظم آزاد کشمیر و چیف الیکشن کمشنر سے اس مبینہ دھاندلی کی مکمل اور غیر جانبدارانہ انکوائری کا تقاضا کیا تھا۔