حوثی حملوں کے بعد باب المندب میں جہازوں کی آمدورفت میں نمایاں کمی

سعودی عرب کے بحیرہ احمر کے ساحلی علاقوں میں واقع تیل کی تنصیبات پر حوثی باغیوں کے حملوں اور ناکہ بندی کے بعد اہم عالمی بحری گزرگاہوں پر تجارتی جہازوں کی آمدورفت انتہائی کم ہو گئی ہے۔ خبر رساں ادارے “رائٹرز” نے شپنگ تجزیاتی پلیٹ فارم “کپلر” کے حوالے سے بتایا کہ اتوار کو باب المندب کی آبنائے سے صرف 11 تجارتی جہاز گزرے جو گزشتہ کئی ماہ کی کم ترین تعداد ہے، جن میں 7 آئل ٹینکر شامل تھے (3 داخل ہوئے جبکہ 4 باہر نکلے)۔ رپورٹ کے مطابق ہفتے اور اتوار کو آبنائے ہرمز سے بھی یومیہ 10 سے کم جہاز گزرے، جہاں ہفتے کو 3 اور اتوار کو مجموعی طور پر 7 جہاز گزرے جن میں 3 ایران سے منسلک ٹینکرز بھی شامل تھے۔ یہ صورتحال ایک ایسے وقت میں سامنے آئی ہے جب امریکہ اور ایران نے وقتی طور پر حملے روک رکھے ہیں۔