لاہور ہائیکورٹ نے مشکوک شہریت کے مقدمات میں سول عدالتوں کا دائرہ اختیار ختم کر دیا

لاہور ہائیکورٹ نے قومی شناختی کارڈز اور مشکوک شہریت کے تنازعات سے متعلق اہم فیصلہ جاری کرتے ہوئے سول عدالتوں کا دائرہ اختیار ختم کر دیا ہے اور نادرا کی نظرثانی درخواست منظور کر لی ہے۔ جسٹس محسن اختر کیانی نے 14 صفحات پر مشتمل تفصیلی فیصلے میں سیالکوٹ کی سول اور ایڈیشنل ڈسٹرکٹ عدالتوں کے 2017 کے فیصلے کالعدم قرار دیتے ہوئے قرار دیا کہ مشکوک شہریت کے معاملے میں براہِ راست سول عدالتوں یا رٹ پٹیشن کے بجائے پہلے ‘نادرا ویریفکیشن بورڈ’ اور ‘پاکستان سٹیزن شپ ایکٹ 1951‘ کے فورمز سے رجوع کرنا لازمی ہوگا۔ عدالت نے حکم دیا کہ شہریت ثابت کرنے کے لیے 1979 سے قبل کے تعلیمی اسناد، ڈومیسائل یا پاسپورٹ کے مستند ثبوت پیش کرنا ہوں گے، جبکہ درکار دستاویزات نہ دینے والوں کو 30 دن کی مہلت ملے گی۔ علاوہ ازیں، ہائیکورٹ نے نادرا ویریفکیشن بورڈ کو درخواستوں کا فیصلہ 60 دن میں کرنے کی ہدایت کرتے ہوئے وفاقی حکومت کو نادرا آرڈیننس میں قانون سازی کی سفارش کی ہے۔