لیگی قیادت حقیقی معنوں میں عوام کی امنگوں کی ترجمان ہے، مریم اورنگزیب

سینئر صوبائی وزیر مریم اورنگزیب نے کہا ہے کہ مسلم لیگ (ن) کی قیادت حقیقی معنوں میں عوام کی امنگوں اور جذبات کی ترجمان ہے۔ راولپنڈی میں ایک بڑے عوامی جلسے سے خطاب کرتے ہوئے انہوں نے دعویٰ کیا کہ پاکستان اور آزاد کشمیر کی خواتین نے اپنا فیصلہ سنا دیا ہے اور آزاد کشمیر کے عوام نواز شریف اور مریم نواز سے بے پناہ عقیدت رکھتے ہیں۔

مریم اورنگزیب نے وزیراعظم شہباز شریف اور وزیراعلیٰ پنجاب مریم نواز کی کارکردگی کو سراہتے ہوئے کہا کہ عوام کی خدمت کے لیے نیت اور محنت کا جذبہ درکار ہوتا ہے۔ انہوں نے بتایا کہ اس وقت پنجاب میں ایک ہزار سے زائد ‘کلینک آن وہیلز’ عوام کو صحت کی سہولیات فراہم کر رہے ہیں جبکہ گزشتہ دو سالوں میں 2 لاکھ افراد کو اپنے گھر دیے گئے ہیں۔

سیاسی مخالفین کو تنقید کا نشانہ بناتے ہوئے ن لیگی رہنما کا کہنا تھا کہ مخالفین پنجاب کے سڑکوں اور ترقیاتی منصوبوں پر تنقید کرنے، رونے اور چیخنے کے بجائے اپنے اپنے صوبوں میں کام کر کے دکھائیں۔ انہوں نے چیلنج دیا کہ سیاسی مخالفین اپنے صوبوں میں ‘ستھرا پنجاب’ جیسا صفائی اور ترقی کا کوئی ایک منصوبہ بنا کر پیش کریں۔