بھارتی وزیرِ دفاع کے کشمیر سے متعلق اشتعال انگیز بیانات، پاکستان کی شدید مذمت

ترجمان دفتر خارجہ طاہر اندرابی نے بھارتی وزیرِ دفاع کی جانب سے مقبوضہ جموں و کشمیر سے متعلق دیے گئے اشتعال انگیز اور غیر ذمہ دارانہ بیانات کی شدید الفاظ میں مذمت کرتے ہوئے انہیں عالمی حقائق کو مسخ کرنے کی ناکام کوشش قرار دیا ہے۔

ترجمان دفتر خارجہ نے واضح کیا کہ کشمیر ایک بین الاقوامی سطح پر تسلیم شدہ تنازع ہے جو آج بھی اقوامِ متحدہ کی سلامتی کونسل کے ایجنڈے پر موجود ہے۔ انہوں نے کہا کہ بھارتی حکام کے ایسے جارحانہ اور بیباکانہ بیانات سے ثابت ہوتا ہے کہ موجودہ بھارتی حکومت خطے کے علاوہ عالمی امن کو بھی سنگین خطرات سے دوچار کرنے کی پالیسی پر گامزن ہے۔

طاہر اندرابی کا مزید کہنا تھا کہ بھارت کی اس تمام تر بیان بازی کا مقصد مقبوضہ وادی پر اپنے غاصبانہ قبضے، خطے میں بھارتی سرپرستی میں جاری دہشت گردی اور اپنے اندرونی عدم استحکام سے دنیا کی توجہ ہٹانا ہے۔ انہوں نے متنبہ کیا کہ بھارت کو کسی بھول میں نہیں رہنا چاہیے؛ پاکستان کی قوم اور بہادر مسلح افواج ہر قسم کی بھارتی مہم جوئی کا بھرپور اور مؤثر جواب دینے کا غیر متزلزل عزم رکھتی ہیں، جس کی عملی مثال ‘آپریشن بنیان المرصوص’ کے دوران دنیا دیکھ چکی ہے۔