کیپٹن محمد سرور شہید کا 78واں یوم شہادت، مسلح افواج کے سربراہان کا خراج عقیدت

فیلڈ مارشل سید عاصم منیر، نیول چیف ایڈمرل نوید اشرف اور ایئر چیف مارشل ظہیر احمد بابر سدھو سمیت پاکستان کی مسلح افواج کے سربراہان نے ملک کے پہلے نشانِ حیدر حاصل کرنے والے عظیم سپوت کیپٹن محمد سرور شہید کے 78ویں یومِ شہادت پر انہیں زبردست خراجِ عقیدت پیش کیا ہے۔

پاک فوج کے شعبہ تعلقات عامہ (آئی ایس پی آر) کے مطابق 27 جولائی 1948ء کو پہلی کشمیر جنگ کے دوران آزاد کشمیر کے علاقے تل پترا میں کیپٹن محمد سرور شہید نے فرض کی ادائیگی کے دوران جامِ شہادت نوش کیا تھا۔ انہوں نے اپنے جوانوں کی قیادت بالکل اگلے مورچوں سے کرتے ہوئے غیر معمولی بہادری، شاندار عسکری حکمتِ عملی اور اعلیٰ ترین سطح کی فرض شناسی کا مظاہرہ کیا۔

آئی ایس پی آر کے بیان میں مزید کہا گیا کہ کیپٹن محمد سرور شہید کی لازوال قربانی جرات، استقامت اور وطن عزیز سے بے لوث وابستگی کی ہمیشہ زندہ رہنے والی علامت ہے۔ پاکستان کے عوام اور مسلح افواج ان کی اس عظیم اور لازوال میراث کو انتہائی احترام، عقیدت اور فخر کے ساتھ سلام پیش کرتے ہیں۔