رانا ثنا اللہ نے ایل اے 10 کوٹلی میں انتخاب روکنے کا مطالبہ کر دیا

مسلم لیگ (ن) کے مرکزی رہنما رانا ثنا اللہ نے آزاد کشمیر کے حلقہ ایل اے 10 کوٹلی میں مبینہ دھاندلی کے شواہد کے بعد انتخاب فوری طور پر روکنے کا مطالبہ کر دیا ہے۔ انہوں نے وزیراعظم آزاد کشمیر اور چیف الیکشن کمشنر سے مطالبہ کیا کہ ثقلین اور قیصر پٹواری سے متعلق تفصیلی انکوائری کی جائے اور جب تک حقائق سامنے نہیں آتے، نتائج اور انتخاب کو معطل رکھا جائے۔ رانا ثنا اللہ نے سرکاری گاڑی میں پریزائیڈنگ افسران کی منتقلی اور پولنگ بیگز کی غیر قانونی نقل و حرکت کو شرمناک قرار دیتے ہوئے شفافیت پر سوالات اٹھائے اور واضح کیا کہ ہم شفاف اور غیر جانبدارانہ انتخابات چاہتے ہیں جبکہ نواز شریف کا ہر کارکن ووٹ چوروں کی نگرانی کرے گا۔

یاد رہے کہ آزاد کشمیر میں مبینہ طور پر 2 پریزائیڈنگ افسران اپنے مقررہ پولنگ اسٹیشن جانے کے بجائے ایک نجی رہائش گاہ چلے گئے تھے، جس پر ریٹرننگ افسر نے فوری ایکشن لیتے ہوئے پولنگ بیگز تحویل میں لے لیے اور دونوں افسران کو معطل کر کے گرفتار کر لیا ہے۔