حق مہر میں جائیداد کی منتقلی پر سپریم کورٹ کا بڑا فیصلہ، نکاح نامے میں تبدیلی کا حکم

سپریم کورٹ آف پاکستان نے حق مہر میں دی گئی جائیداد کی منتقلی سے متعلق اہم قانونی اصول طے کر دیے ہیں۔ جسٹس شکیل احمد کی جانب سے جاری کردہ تحریری فیصلے میں واضح کیا گیا ہے کہ مشترکہ جائیداد کا کوئی بھی حصہ دار اپنے موروثی حصے سے زیادہ جائیداد منتقل کرنے کا مجاز نہیں ہے۔ عدالت نے قرار دیا کہ شوہر مشترکہ جائیداد میں صرف اپنے حصے کی حد تک ہی حق مہر دے سکتا ہے اور پورے گھر کو حق مہر میں دینے کا دعویٰ دیگر قانونی ورثاء کے حقوق پر اثر انداز نہیں ہو سکتا۔

عدالتِ عظمیٰ نے غیر ضروری قانونی چارہ جوئی سے بچنے کے لیے نکاح رجسٹرار اور نکاح خواں کو ہدایت کی ہے کہ وہ حق مہر میں درج جائیداد کی ملکیت کی پہلے تصدیق کریں۔ اس کے علاوہ سپریم کورٹ نے نکاح نامہ میں جائیداد کی ملکیت سے متعلق ایک علیحدہ کالم شامل کرنے کا بھی حکم دیا ہے تاکہ شفافیت برقرار رہے۔

سپریم کورٹ نے اس فیصلے کی کاپی تمام صوبوں کے چیف سیکرٹریز کو ضروری کارروائی اور فوری عملدرآمد کے لیے ارسال کرنے کی ہدایت کر دی ہے۔ عدالت نے یہ اصول طے کرتے ہوئے پشاور ہائی کورٹ کے فیصلے کے خلاف دائر سول پٹیشن کو خارج کر دیا۔