پاکستان، سعودی عرب کا زرعی و غذائی برآمدات 3 ارب ڈالر تک بڑھانے کا عزم

اسلام آباد: وزیراعظم شہباز شریف کی خصوصی کاوشوں کے نتیجے میں پاکستان اور سعودی عرب نے زراعت اور غذائی تحفظ کے شعبوں میں اہم پیش رفت کرتے ہوئے آئندہ دو برسوں کے دوران سعودی عرب کو پاکستانی زرعی و غذائی برآمدات کا حجم 3 ارب ڈالر تک لے جانے کے تاریخی عزم کا اظہار کیا ہے۔

دونوں ممالک کے درمیان جاری کردہ مشترکہ اعلامیے کے مطابق چاول، سرخ گوشت، پھل، کنسنٹریٹس اور سبز چارے کو ترجیحی شعبے قرار دیا گیا ہے۔ اعلامیے میں بتایا گیا ہے کہ سعودی عرب نے پاکستان سے چاول اور سرخ گوشت کی درآمدات میں نمایاں اضافے میں گہری دلچسپی ظاہر کی ہے۔ یاد رہے کہ سال 2025ء میں پاکستان نے سعودی عرب کو 163 ملین ڈالر مالیت کا 169 ہزار ٹن چاول جبکہ 167 ملین ڈالر مالیت کا 30 ہزار ٹن سرخ گوشت برآمد کیا تھا، جسے اب بتدریج دُگنا کرنے پر اتفاق ہوا ہے۔ علاوه ازیں، بھکر میں پانی کے مؤثر استعمال پر مبنی آبپاشی منصوبے کے پہلے مرحلے کی کامیا بی کے بعد سعودی عرب نے چھوٹے کاشتکاروں کے لیے اس کے دوسرے مرحلے میں بھی تعاون بڑھانے کی خواہش ظاہر کی ہے

یہ پیش رفت سعودی وزیر برائے ماحولیات، پانی و زراعت کی قیادت میں ایک اعلٰی سطح کے وفد کے 26 سے 28 اگست 2026ء کے دورہٴ اسلام آباد کے دوران سامنے آئی، جہاں وفد نے وزیراعظم شہباز شریف سے ملاقات کر کے دوطرفہ اسٹریٹجک شراکت داری کا اعادہ کیا۔ دورے کے دوران سعودی عرب نے پاکستان کو ‘انٹرنیشنل ڈیٹس کونسل’ میں شمولیت کی ترغیب دی، جبکہ پاکستان نے 19 سے 22 اکتوبر 2026ء تک ریاض میں منعقد ہونے والی 43ویں ‘سعودی ایگریکلچر نمائش’ میں شرکت کی دعوت کا خیرمقدم کیا۔