نالہ ڈیک میں پانی کی سطح میں مسلسل اضافہ، درمیانے درجے کا سیلاب

ظفروال: محکمہ آبپاشی کے مطابق ظفروال کے مقام پر نالہ ڈیک میں پانی کی سطح میں مسلسل اضافہ ہو رہا ہے، جس کے بعد نالے میں درمیانے درجے کا سیلاب ریکارڈ کیا گیا ہے۔

محکمہ آبپاشی کی جانب سے جاری کردہ تازہ اعداد و شمار کے مطابق اس وقت نالہ ڈیک سے 16 ہزار کیوسک پانی کا سیلابی ریلا گزر رہا ہے، جبکہ نالے میں پانی کے بہاؤ کی مجموعی گنجائش 30 ہزار کیوسک ہے۔ سیلابی صورتحال کے پیشِ نظر ضلعی انتظامیہ اور ریسکیو اداروں کو ہائی الرٹ کر دیا گیا ہے اور نالے کے مختلف مقامات پر پانی کے بہاؤ کی مسلسل نگرانی کی جا رہی ہے۔

انتظامیہ نے نالہ ڈیک کے قریبی دیہات اور نشیبی علاقوں کے رہائشیوں کو غیر ضروری نقل و حرکت سے گریز کرنے، مویشیوں کو محفوظ مقامات پر منتقل کرنے اور تمام تر احتیاطی تدابیر اختیار کرنے کی سخت ہدایت کی ہے۔ محکمہ آبپاشی کا کہنا ہے کہ بالائی علاقوں میں مزید بارشوں کے نتیجے میں نالہ ڈیک میں پانی کے بہاؤ اور سطح میں مزید اضافے کا خدشہ موجود ہے۔