پاکستان اور ازبکستان کا اقتصادی روابط مزید مضبوط بنانے پر اتفاق

پاکستان اور ازبکستان نے دوطرفہ تجارت، سرمایہ کاری اور اقتصادی تعلقات کو مزید مضبوط بنانے پر اتفاق کیا ہے۔ اس سلسلے میں ازبکستان میں تعینات پاکستانی سفیر محمد مدثر ٹیپو نے ازبک نائب وزیراعظم جمشید خودجایف سے اہم ملاقات کی، جس میں دونوں ممالک کے درمیان اقتصادی تعاون بڑھانے پر تفصیلی تبادلہ خیال کیا گیا۔ ملاقات میں پاکستانی سفیر نے ازبکستان کے 35 ویں یومِ آزادی پر مبارکباد دی اور مختلف شعبوں میں ازبکستان کی پیش رفت کو سراہا۔ ازبک نائب وزیراعظم کا کہنا تھا کہ دونوں ممالک کے سرکاری اداروں، چیمبرز اور کاروباری برادری کو متحرک کر کے اقتصادی صلاحیتوں سے بھرپور فائدہ اٹھایا جا سکتا ہے، جبکہ دونوں ممالک نے اقتصادی روابط کے فروغ کے لیے ایک جامع روڈ میپ بھی تیار کر رکھا ہے۔