اسلام آباد یادداشت پر عملدرآمد سے مشکلات پر قابو پا سکتے ہیں: ایرانی صدر

ایرانی صدر مسعود پزشکیان نے کہا ہے کہ اگر اندرونی اتحاد کے ساتھ اسلام آباد مفاہمتی یادداشت پر عمل درآمد کیا جائے تو ایران کو اپنے درپیش مسائل پر قابو پانے میں مدد مل سکتی ہے۔ ایرانی نیم سرکاری خبر رساں ایجنسی ‘اثنا’ کے مطابق انہوں نے واضح کیا کہ اس مفاہمت پر عمل درآمد سے امریکا اور اسرائیل کو خطے میں عدم استحکام پیدا کرنے سے روکا جا سکے گا اور علاقائی ممالک اتحاد کے ذریعے ترقی کر سکیں گے۔ صدر پزشکیان نے حکومت کے تینوں شعبوں اور سپریم نیشنل سکیورٹی کونسل کے درمیان بڑھتی ہوئی ہم آہنگی کا ذکر کرتے ہوئے اس بات کا اعتراف بھی کیا کہ امریکی پابندیاں ملکی معیشت کو نقصان پہنچا رہی ہیں اور ملک جنگ جیسی صورتحال سے گزر رہا ہے۔ انہوں نے مزید کہا کہ ایران جنگ نہیں چاہتا اور نہ ہی کسی دباؤ کے سامنے سر جھکائے گا، تاہم کسی بھی جارحیت کی صورت میں ملک کا دفاع پوری قوت سے کیا جائے گا۔