دماغ میں پیوند لگانے کا مختصر اور نسبتاً آسان طریقہ تیار

چین کی ایک بائیو ٹیک اسٹارٹ اپ کمپنی ‘اسٹیر میڈ ٹیکنالوجی’ نے دعویٰ کیا ہے کہ انہوں نے دماغ میں چپ یا پیوند (Brain-Computer Interface) لگانے کا ایسا جدید اور کم سے کم جراحی والا طریقہ تیار کر لیا ہے جس میں سر کی ہڈی (کھوپڑی) کھولنے یا روایتی سرجری کی ضرورت نہیں پڑے گی۔ کمپنی کے مطابق یہ پورا عمل محض 10 منٹ کے مختصر وقت میں انجام دیا جا سکے گا۔

اسٹیر میڈ کے شریک بانی ژاؤ ژینگ تو کے مطابق، اس نئے طریقے میں آلہ گردن کی ایک رگ کے ذریعے جسم میں داخل کیا جاتا ہے اور خون کی نالیوں کے قدرتی راستے سے ہوتا ہوا دماغ تک پہنچتا ہے۔ دیگر روایتی طریقوں کے برعکس، جہاں برقی آلات سیدھے دماغی بافتوں کے اندر لگائے جاتے ہیں، یہ چپ خون کی نالی کی بیرونی دیوار کے ساتھ خود کو قائم کرتی ہے۔ شنوو اسپتال کے ڈاکٹر دوان وان رو کا کہنا ہے کہ درمیانے درجے کی مہارت رکھنے والا جراح بھی اسے تقریباً 10 منٹ میں نصب کر سکتا ہے، جبکہ نیورلنک جیسے آلات لگانے کے لیے سرجیکل روبوٹ اور 2 گھنٹے کا وقت درکار ہوتا ہے۔

رپورٹس کے مطابق ٹینسنٹ اور علی بابا جیسے بڑے چینی ٹیکنالوجی اداروں کی جانب سے اسٹیر میڈ کو گزشتہ ایک سال میں 1.1 ارب یوآن (تقریباً 16 کروڑ 30 لاکھ ڈالر) سے زائد کی سرمایہ کاری حاصل ہوئی ہے۔ تاہم یہ ٹیکنالوجی فی الوقت بھیڑوں پر آزمائی جا رہی ہے اور انسانوں پر کلینیکل ٹرائلز شروع ہونا باقی ہیں، جس کا مطلب ہے کہ 10 منٹ میں پیوندکاری کا یہ دعویٰ عملی طور پر ثابت ہونا باقی ہے۔ امریکی کمپنی ‘سنکرون’ (Synchron) بھی رگوں کے ذریعے برین چپ کی آزمائش کر چکی ہے، مگر چینی کمپنی کا نظام نالی کے باہر نصب ہو کر ایک نیا تجربہ پیش کرتا ہے۔