حوثیوں نے جدید میزائل بنانے کیلئے اے آئی کا استعمال کیا، رپورٹ میں انکشاف

یمن میں حوثی باغیوں سے منسلک ایک گروپ کی جانب سے امریکی مصنوعی ذہانت (AI) کی کمپنی ‘اینتھروپک’ (Anthropic) کے اے آئی چیٹ بوٹ ‘کلاڈ’ (Claude) کو گائیڈڈ راکٹ اور بیلسٹک میزائل تیار کرنے کے لیے استعمال کرنے کی کوشش کا انکشاف ہوا ہے۔ اینتھروپک کی جانب سے جاری کردہ ایک حالیہ رپورٹ کے مطابق شمالی یمن میں ایک سیکیورٹی خطرے کی نشاندہی کی گئی، جہاں ایک گروپ کلاڈ چیٹ بوٹ کی مدد سے نیوی گیشن، گائیڈنس اور کنٹرول سافٹ ویئر تیار کر رہا تھا تاکہ ہتھیاروں کے تین پیچیدہ منصوبوں کو مکمل کیا جا سکے۔

رپورٹ کے مطابق ان منصوبوں میں عام موبائل فون سے کنٹرول ہونے والا گائیڈڈ راکٹ، 2 ہزار کلومیٹر سے زائد رینج کا کثیر مرحلہ بیلسٹک میزائل اور ہائپر سونک گلائیڈ وہیکل پر مشتمل میزائل سسٹم شامل تھے۔ کمپنی کے مطابق یہ کام عام طور پر درجنوں انجینئرز کی ٹیم کی محتاجی مانگتا ہے جو اس گروپ نے AI سے حاصل کیا۔ تاہم اینتھروپک نے تصدیق کی کہ اس گروپ کی جانب سے کیے جانے والے گائیڈڈ راکٹ کا تجرباتی فائر ناکام رہا اور گروپ نے راکٹ ناکامی کی وجوہات جاننے کے لیے دوبارہ کلاڈ سے رجوع کیا تھا، جبکہ فی الوقت کسی عملی ہتھیار کے مکمل تیار ہونے کے ثبوت نہیں ملے۔