یوٹیوب پروفائل محفوظ رکھنے کے لئے نیا فیچر متعارف

کیلیفورنیا: دنیا کے سب سے بڑے ویڈیو شیئرنگ پلیٹ فارم ‘یوٹیوب’ نے سمارٹ ٹی وی اور مشترکہ ڈیوائسز استعمال کرنے والے صارفین کی پرائیویسی کو محفوظ بنانے کے لیے ایک نیا اور اہم ‘پروفائل لاک’ فیچر متعارف کروا دیا ہے، جس کے تحت صارف 4 ہندسوں پر مشتمل پن (PIN) کوڈ کے ذریعے اپنے اکاؤنٹ کو مقفل کر سکے گا۔

یوٹیوب کے چیف ایگزیکٹو آفیسر (CEO) نیل موہن کے مطابق، یہ فیچر اب عالمی سطح پر تمام صارفین کے لیے فعال کیا جا رہا ہے۔ اس نئے اقدام کا بنیادی مقصد یہ یقینی بنانا ہے کہ ایک ہی گھر میں سمارٹ ٹی وی استعمال کرنے والے دیگر افراد کسی دوسرے صارف کے ذاتی پروفائل، واچ ہسٹری، سبسکرپشنز اور ویڈیوز کی ذاتی نوعیت کی سفارشات (Recommendations) تک رسائی حاصل نہ کر سکیں۔

پروفائل پر سیکورٹی لاک لگانے کے لیے صارفین کو ٹی وی پر یوٹیوب ایپ کی بائیں جانب موجود نیویگیشن بار میں جا کر ‘سیٹنگز’ کے ذریعے اس فیچر کو فعال کرنا ہو گا۔ تاہم یوٹیوب نے واضح کیا ہے کہ یہ پن کوڈ ڈیوائس کی سطح پر کام کرے گا، یعنی اگر ایک گھر میں دو مختلف ٹی وی ڈیوائسز موجود ہیں تو دونوں کے لیے الگ الگ کوڈ ترتیب دینا ہو گا۔

اس فیچر کی ایک اور خاصیت یہ ہے کہ ہر بار ریموٹ سے چار ہندسوں کا پاسورڈ ٹائپ کرنا ضروری نہیں ہو گا۔ صارف اپنے سمارٹ فون میں موجود یوٹیوب ایپ پر آنے والے نوٹیفکیشن کی مدد سے بھی ایک ٹیپ پر پروفائل کو باآسانی ان لاک کر سکتا ہے۔

اگر کوئی صارف اپنا 4 ہندسوں کا پن کوڈ بھول جاتا ہے تو وہ ٹی وی سکرین پر موجود ‘فارگیٹ پاسورڈ’ (Forgot Password) کے آپشن پر کلک کر کے اپنے اصل گوگل اکاؤنٹ کی معلومات سے تصدیق کر کے نیا کوڈ سیٹ کر سکتا ہے۔ یوٹیوب انتظامیہ نے واضح کیا ہے کہ یہ 4 ہندسوں کا کوڈ اصل پاس ورڈ کا متبادل نہیں بلکہ محض مشترکہ سکرین پر پروفائل پرائیویسی کو قائم رکھنے کا ایک آسان ذریعہ ہے۔