معرکۂ حق’ کا ایک سال مکمل: پاکستان کی سفارتی ساکھ میں نمایاں اضافہ ہوا، رضوان سعید شیخ

امریکہ میں تعینات پاکستانی سفیر رضوان سعید شیخ نے ‘معرکۂ حق’ کے ایک سال مکمل ہونے پر اپنے خصوصی انٹرویو میں کہا ہے کہ پاکستان خطے میں اپنی دفاعی، سفارتی اور سیاسی حکمتِ عملی کی بنیاد پر استحکام کے ایک اہم عامل کے طور پر ابھرا ہے۔ انہوں نے زور دیا کہ اس معرکے کے بعد بین الاقوامی سطح پر پاکستان کی قدر و منزلت اور سفارتی ساکھ میں نمایاں اضافہ ہوا ہے۔

پاکستانی سفیر نے پہلگام واقعے کا ذکر کرتے ہوئے کہا کہ پاکستان نے فوری طور پر شفاف تحقیقات کا مطالبہ کیا تھا، جبکہ اس کے برعکس بھارت نے بغیر کسی ثبوت کے الزامات عائد کیے اور غیر قانونی جارحیت کا ارتکاب کیا۔ انہوں نے واضح کیا کہ پاکستان مسلسل عالمی برادری کو خبردار کرتا رہا ہے کہ جوہری صلاحیت رکھنے والے اس خطے میں کسی بھی قسم کی عسکری مہم جوئی کی کوئی گنجائش نہیں ہے۔

رضوان سعید شیخ کا مزید کہنا تھا کہ بھارتی جارحیت کے باوجود پاکستان نے سیاسی، سفارتی اور عسکری پختگی کا مظاہرہ کیا، جس سے قومی وقار بلند ہوا۔ انہوں نے موازنہ کرتے ہوئے کہا کہ اگرچہ پاکستان کے دفاعی اخراجات بھارت کے مقابلے میں بہت کم ہیں، لیکن ہماری اصل طاقت دفاعی صلاحیت، قومی عزم اور عوام کی قوتِ اخوت ہے۔ انہوں نے قیامِ امن کے لیے امریکی صدر ڈونلڈ ٹرمپ اور ان کی ٹیم کے فعال کردار کو بھی سراہا، جسے عالمی سطح پر تسلیم کیا گیا ہے۔