مریم نواز کے بیان کو غلط رنگ دینے کی کوشش کی گئی: عظمیٰ بخاری

وزیرِ اطلاعات پنجاب عظمیٰ بخاری نے وزیراعلیٰ پنجاب مریم نواز کے حالیہ بیان پر خیبرپختونخوا حکومت کے ردعمل کو شدید تنقید کا نشانہ بناتے ہوئے کہا ہے کہ مریم نواز کی گفتگو کو غلط رنگ دینے اور سیاسی مقاصد کے لیے استعمال کرنے کی ناکام کوشش کی گئی। میڈیا سے گفتگو کرتے ہوئے انہوں نے کہا کہ معرکۂ حق میں پاکستان کو عظیم تاریخی کامیابی حاصل ہوئی ہے اور ہماری بہادر مسلح افواج نے ہر محاذ پر اپنی صلاحیتوں کا لوہا منوایا ہے। انہوں نے واضح کیا کہ مریم نواز نے صرف اتنا کہا تھا کہ اپنے صوبے میں امن و امان قائم کرنا صوبائی حکومتوں کی بنیادی آئینی ذمہ داری ہے۔

عظمیٰ بخاری نے سوال اٹھایا کہ اس بیان سے پختون بھائیوں کی توہین کیسے ہو گئی؟ پختونوں کی توہین تب ہوتی ہے جب انہیں معیاری تعلیم اور صحت کی سہولیات سے محروم رکھا جاتا ہے اور پورا صوبہ انتظامی تباہ حالی کا شکار ہو جاتا ہے۔ انہوں نے وزیراعلیٰ خیبرپختونخوا سہیل آفریدی کو تنقید کا نشانہ بناتے ہوئے کہا کہ وہ سرکاری وسائل اور پروٹوکول کے ساتھ دیگر صوبوں میں دندناتے پھر رہے ہیں اور خیبرپختونخوا کے عوامی وسائل کو انتشاری سیاست کے لیے استعمال کیا جا رہا ہے۔ انہوں نے مزید کہا کہ خیبرپختونخوا میں امن و امان کی صورتحال انتہائی ابتر ہو چکی ہے مگر وہاں کی حکومت دہشت گردی کے خلاف اقدامات کے بجائے سیاسی بیان بازی میں مصروف ہے، جبکہ مریم نواز پختونخوا سمیت پورے ملک میں امن کی خواہاں ہیں۔