روس اور شمالی کوریا کو ملانے والے نئے پل کا افتتاح کردیا گیا

روس اور شمالی کوریا کے درمیان زمینی رابطے کو تیز اور مضبوط بنانے کے لیے نئے سڑک پل (روڈ برج) کا باضابطہ افتتاح کر دیا گیا ہے، جسے دونوں ممالک نے اپنی مستحکم ہوتی اسٹریٹجک شراکت داری میں ایک تاریخی سنگِ میل قرار دیا ہے۔ روسی سرکاری خبر رساں ایجنسی ‘تاس’ کے مطابق دونوں ممالک کی سرحد پر واقع دریائے تومن (Tumen River) پر تعمیر کیا گیا یہ پل دوطرفہ زمینی نقل و حمل اور تجارتی آمدورفت میں کلیدی کردار ادا کرے گا۔ یہ نیا پل 1959ء میں کورین جنگ کے بعد فعال ہونے والے قدیم ‘فرینڈشپ ریلوے برج’ کے قریب ہی تعمیر کیا گیا ہے۔

روسی وزیراعظم میخائل مشوستن نے افتتاح کے موقع پر کہا کہ اس نئے زمینی راستے سے سیاحت، سرحد پار تجارت اور لاجسٹکس کے شعبوں میں تعاون کو فروغ ملے گا جس سے خطے میں روزگار کے نئے مواقع پیدا ہوں گے۔ اس منصوبے پر سالہا سال کی بات چیت کے بعد صدر ولادی میر پیوٹن کے جون 2024ء میں شمالی کوریا کے دورے کے دوران حتمی اتفاق ہوا تھا، جس کے بعد اپریل 2025ء میں باقاعدہ تعمیراتی کام شروع کیا گیا۔ یاد رہے کہ 2022ء میں یوکرین جنگ کے آغاز کے بعد سے ماسکو اور پیانگ یانگ کے تعلقات میں بے پناہ قربت آئی ہے اور شمالی کوریا نے 2024ء میں روسی عسکری مہم کی مدد کے لیے ہزاروں فوجی بھی روانہ کیے تھے۔