بین الاقوامی اسلامی یونیورسٹی میں تیندوے کی موجودگی، انتظامیہ اور وائلڈ لائف کے لیے بڑا چیلنج

بین الاقوامی اسلامی یونیورسٹی اسلام آباد میں داخل ہونے والا تیندوا یونیورسٹی انتظامیہ اور وائلڈ لائف حکام کے لیے امتحان بن گیا ہے۔ تیندوا 24 دسمبر کو یونیورسٹی کی حدود میں داخل ہوا تھا تاہم 10 روز گزر جانے کے باوجود وائلڈ لائف ڈیپارٹمنٹ اسے قابو میں لانے میں ناکام رہا ہے۔

حکام کے مطابق یونیورسٹی کے مختلف مقامات سے تیندوے کی موجودگی کے مزید شواہد بھی موصول ہوئے ہیں جس کے بعد سکیورٹی خدشات میں اضافہ ہو گیا ہے۔ وائلڈ لائف مینجمنٹ بورڈ کی جانب سے یونیورسٹی کیمپس میں خصوصی ٹریپر نصب کر دیے گئے ہیں تاکہ تیندوے کو محفوظ طریقے سے پکڑا جا سکے۔

موجودہ صورتحال کے پیش نظر یونیورسٹی انتظامیہ نے طلبہ کو غیر ضروری نقل و حرکت سے گریز اور مکمل احتیاط برتنے کی ہدایت جاری کی ہے۔ وائلڈ لائف ڈیپارٹمنٹ نے طلبہ کے لیے متبادل محفوظ راستوں کی بھی نشاندہی کر دی ہے تاکہ کسی ناخوشگوار واقعے سے بچا جا سکے۔

تیندوے کی تلاش کے لیے وائلڈ لائف، پولیس اور ضلعی انتظامیہ کی مشترکہ ٹیمیں سرچ آپریشن میں مصروف ہیں، جبکہ جدید ٹیکنالوجی کے استعمال کے تحت ڈرون کیمروں سے بھی نگرانی کی جا رہی ہے۔

حکام کا کہنا ہے کہ سرچ آپریشن اس وقت تک جاری رہے گا جب تک تیندوے کو بحفاظت قابو میں نہیں کر لیا جاتا، طلبہ اور عملے کی سلامتی اولین ترجیح ہے۔