منشیات ڈیلر انمول پنکی کیخلاف درج مقدمے سے قتل کی دفعات ختم

کراچی کے علاقے بغدادی کے تھانے میں منشیات ڈیلر ملزمہ انمول عرف پنکی کے خلاف درج قتل کے مقدمے میں پولیس نے حتمی چالان پیش کرتے ہوئے قتل کی بنیادی دفعہ ختم کر کے ‘قتل بالسبب’ کی دفعہ شامل کر دی ہے۔ پولیس چالان کے مطابق کیمیکل رپورٹ میں متوفی کی موت نشے کی زیادتی سے ظاہر ہوئی ہے، تاہم لاش کی شناخت اور ڈی این اے سیمپل کے بغیر براہِ راست ملزمہ سے تعلق ثابت نہیں ہو سکا۔ دوسری جانب، پراسیکیوشن ذرائع کا کہنا ہے کہ پولیس چالان میں ‘قتل بالسبب’ کے بنیادی قانون عناصر اور شواہد غائب ہیں، کیونکہ میڈیکو لیگل افسر نے پوسٹ مارٹم کو نیگیٹو آٹوپسی قرار دیا ہے اور متوفی کے معدے سے زہر یا منشیات کا ثبوت نہیں ملا۔ عدمِ شواہد اور تفتیشی نقائص کی بناء پر پراسیکیوشن نے ضابطہ فوجداری کی دفعہ 344 کے تحت مقدمہ التوا میں رکھتے ہوئے داخلِ دفتر کرنے کی سفارش کر دی ہے۔