کمانڈر نیشنل سٹریٹجک کمانڈ جنرل عامر رضا کو نشان امتیاز (ملٹری) عطا کرنے کی منظوری

صدرِ مملکت آصف علی زرداری نے ایوانِ صدر کے اعلامیے کے مطابق کمانڈر نیشنل اسٹریٹجک کمانڈ 4 اسٹار جنرل سید عامر رضا کو اعلیٰ عسکری خدمات کے اعتراف میں نشانِ امتیاز (ملٹری) عطا کرنے کی باضابطہ منظوری دے دی ہے۔ واضح رہے کہ گزشتہ ہفتے ہی وزیراعظم شہباز شریف نے چیف آف جنرل اسٹاف، ہلالِ امتیاز (ملٹری) اور ستارۂ بسالت کے حامل لیفٹیننٹ جنرل عامر رضا کو فور اسٹار جنرل کے عہدے پر ترقی دیتے ہوئے کمانڈر نیشنل اسٹریٹجک کمانڈ مقرر کیا تھا۔ وزیراعظم نے جنرل سید عامر رضا کو ترقی پانے اور نئی اسٹریٹجک ذمہ داریاں سنبھالنے پر دلی مبارکباد پیش کرتے ہوئے ان کی مستقبل کی پیشہورانہ خدمات کے لیے نیک تمناؤں کا اظہار کیا ہے۔