دریائے سندھ میں کالا باغ اور چشمہ کے مقام پر نچلے درجے کا سیلاب

پی ڈی ایم اے (PDMA) پنجاب کے مطابق صوبے کے بیشتر دریاؤں جن میں چناب، جہلم، راوی اور ستلج شامل ہیں، میں پانی کا بہاؤ معمول کے مطابق ہے، تا ہم دریائے سندھ میں کالاباغ کے مقام پر 2,63,000 کیوسک اور چشمہ پر 2,94,000 کیوسک کے ساتھ نچلے درجے کا سیلاب ریکارڈ کیا گیا ہے۔ وزیر آباد نالہ پلکھو میں 3,600 کیوسک کے ساتھ درمیانے درجے جبکہ نارووال نالہ بسنتر میں نچلے درجے کا سیلاب ہے۔ ترجمان کے مطابق مون سون بارشوں کا چوتھا سلسلہ 5 اگست 2026 تک جاری رہنے کا امکان ہے، جس کے باعث بالائی کیچمنٹس میں بارشوں سے مشرقی دریاؤں اور نالوں میں طغیانی کا خدشہ ہے۔ ڈی جی پی ڈی ایم اے عرفان علی کاکڑ اور سیف انور جپہ نے لاہور، راولپنڈی، گوجرانوالہ، گجرات، سیالکوٹ، فیصل آباد اور ملتان میں اربن فلڈنگ، جبکہ مری و گلیات میں لینڈ سلائیڈنگ کا خطرہ ظاہر کرتے ہوئے شہریوں کو ندی نالوں کی سیر و تفریح سے گریز اور محفوظ مقامات پر منتقل ہونے کی ہدایت کی ہے۔