مریم نواز نے 5 روز میں صاف پانی کی فراہمی کا فول پروف پلان طلب کر لیا

وزیر اعلیٰ پنجاب مریم نواز شریف نے ‘پنجاب صاف پانی اتھارٹی’ کے اجلاس کی صدارت کرتے ہوئے 5 روز کے اندر صوبے بھر میں صاف پانی کی فراہمی کا فول پروف پلان طلب کر لیا ہے۔ اجلاس میں ‘ستھرا پنجاب’ کی طرز پر اتھارٹی کو جدید خطوط پر اپ گریڈ اور ری سٹرکچر کرنے کا فیصلہ کیا گیا، جس کے تحت بین الاقوامی (جاپانی اور چینی) ٹیکنالوجی، ہیومن ریسورس، ٹرانسپورٹ اور انٹرنیشنل کنسلٹینسی کی خدمات حاصل کی جائیں گی۔ بریفنگ کے دوران بتایا گیا کہ صوبے کے 5,734 واٹر فلٹریشن اور آر او (RO) پلانٹس کی مرمت، نگہداشت اور مانیٹرنگ کو یقینی بنایا جائے گا جبکہ ہر پلانٹ پر پلانٹ آئی ڈی، آپریٹر کا نام اور فون نمبر درج ہو گا۔ مزید برآں، دور دراز علاقوں کے لیے موبائل بوٹلنگ پلانٹس کے ذریعے روزانہ 2,400 سے زائد خاندانوں کو پینے کا صاف پانی فراہم کیا جا رہا ہے۔