بھارت کی موجودہ قیادت نفرت کی سیاست سے اپنے ہی ملک کو نقصان پہنچا رہی ہے: سفیر فیصل نیاز ترمذی

روس میں پاکستان کے سفیر فیصل نیاز ترمذی نے ماسکو میں صحافیوں سے گفتگو کرتے ہوئے کہا ہے کہ پاکستان اور بھارت دونوں ایٹمی طاقتیں ہیں، اس لیے دونوں ممالک کو ذمہ داری کا مظاہرہ کرنا چاہئے۔ پاکستان بھارت کے ساتھ مذاکرات، عوامی روابط، ثقافتی تبادلوں اور پرامن تعلقات کا خواہاں ہے، تاہم موجودہ بھارتی قیادت کی پالیسیاں اور ہمسایہ ممالک پر دباؤ ڈالنے کی روش خطے میں کشیدگی کو بڑھا رہی ہے۔ انہوں نے سندھ طاس معاہدے کی اہمیت پر زور دیتے ہوئے کہا کہ پانی کو سیاسی ہتھیار نہ بنایا جائے کیونکہ یہ پاکستان کی زراعت اور زندگی کا بنیادی ذریعہ ہے، اور بین الاقوامی معاہدوں پر پاسداری ضروری ہے۔

افغانستان اور مشرقِ وسطیٰ کی صورتحال پر بات کرتے ہوئے سفیر پاکستان نے واضح کیا کہ افغان سرزمین کو پاکستان یا کسی بھی دوسرے ملک کے خلاف دہشت گردی کے لیے استعمال نہیں ہونا چاہئے۔ پاکستان ایک پرامن اور مستحکم افغانستان کا حامی ہے لیکن دہشت گردی کو قبول نہیں کر سکتا۔ ایران اور مشرقِ وسطیٰ میں جاری کشیدگی کے حوالے سے انہوں نے خبردار کیا کہ خلیجی خطے میں کسی بھی بڑے تصادم کے اثرات عالمی معیشت، توانائی اور خوراک کی فراہمی پر منفی انداز میں مرتب ہوں گے، اس لیے تمام فریقین کو سفارت کاری اور تحمل کا راستہ اختیار کرنا چاہئے۔

پاک روس دوطرفہ تعلقات پر روشنی ڈالتے ہوئے فیصل نیاز ترمذی نے بتایا کہ وزیراعظم شہباز شریف کا متوقع دورۂ روس منسوخ نہیں بلکہ مؤخر ہوا ہے اور دونوں ممالک جلد نئی تاریخوں پر اتفاق کریں گے۔ انہوں نے پاکستان اور روس کے درمیان براہِ راست پروازوں کی شروعات، ویزا سہولیات، تعلیم، سیاحت اور ثقافتی تبادلوں کو مزید فروغ دینے کی ضرورت پر زور دیا، تاکہ دونوں ممالک کے درمیان دوطرفہ اور عوامی روابط کو مزید استحکام حاصل ہو سکے۔