بھارت فلسطین کیخلاف اسرائیل کو اسلحہ اور دفاعی پرزے فراہم کرتا رہا: ایمنسٹی انٹرنیشنل

عالمی حقوقِ انسانی کی تنظیم ایمنسٹی انٹرنیشنل نے ایک تہلکہ خیز رپورٹ میں دعویٰ کیا ہے کہ بھارت اسرائیل کو فلسطینیوں کے خلاف مبینہ نسل کشی میں استعمال ہونے والا اسلحہ، دفاعی پرزے اور گولہ بارود فراہم کرتا رہا ہے۔ رپورٹ کے مطابق، اکتوبر 2023 سے نومبر 2025 کے دوران بھارت کی جانب سے اسرائیل کو اسلحہ اور ملٹری سپلائیز کی مجموعی طور پر 2,596 کھیپیں برآمد کی گئیں۔

ایمنسٹی انٹرنیشنل کا کہنا ہے کہ اس عرصے کے دوران بھارتی نجی فرموں اور سرکاری دفاعی کمپنیوں نے اسرائیل کی اہم دفاعی کمپنیوں، بشمول ایلبٹ سسٹمز (Elbit Systems) اور اسرائیل ایرو اسپیس انڈسٹریز (IAI) کو مختلف قسم کے اہم فوجی پرزہ جات اور گولہ بارود فراہم کیے۔ ان آلات میں بارودی مواد، ڈرون کے وار ہیڈز، مشین گن کے پرزے اور ملٹری گاڑیوں کے اجزاء شامل ہیں۔

حقوقِ انسانی کی تنظیم نے الزام عائد کیا ہے کہ مذکورہ اسرائیلی دفاعی کمپنیاں بین الاقوامی قانون کے تحت فلسطینیوں کے خلاف نسل کشی اور دیگر سنگین جنگی جرائم میں براہِ راست یا بالواسطہ طور پر ملوث ہیں۔ رپورٹ میں واضح کیا گیا ہے کہ عالمی عدالتِ انصاف (ICJ) کی جانب سے نسل کشی کے خدشات پر جاری کردہ احکامات کے باوجود بھارتی حکام کی جانب سے ان برآمدات کا سلسلۂ جاری رہنا بین الاقوامی ذمہ داریوں کی خلاف ورزی کے زمرے میں آتا ہے۔

واضح رہے کہ یہ تمام الزامات ایمنسٹی انٹرنیشنل کی نئی تحقیقاتی رپورٹ پر مبنی ہیں۔ اس خبر کے اجراء اور رپورٹ کی اشاعت کے وقت تک بھارتی حکومت اور متعلقہ اسرائیلی کمپنیوں کی جانب سے ان سنگین الزامات پر کوئی باضابطہ ردعمل سامنے نہیں آیا ہے۔