وفاقی آئینی عدالت کا ریٹائرڈ ملازمین کے حق میں بڑا فیصلہ

وفاقی آئینی عدالت نے ریٹائرڈ ملازمین کے حق میں تاریخی فیصلہ سناتے ہوئے پنشن اور پنشنری مراعات کو ملازمین کا بنیادی اور جائز قانونی حق قرار دے دیا ہے۔ جسٹس ارشد حسین کے تحریر کردہ 9 صفحات پر مشتمل فیصلے میں واضح کیا گیا ہے کہ مجاز عدالت کے حکم کے بغیر کسی بھی ریٹائرڈ ملازم کی پنشن یا مراعات نہیں روکی جا سکتیں اور ان کی ادائیگی میں غیر ضروری تاخیر توہینِ عدالت تصور ہو گی۔ عدالت نے قرار دیا کہ بروقت اپیل یا نظرثانی دائر نہ ہونے کی صورت میں عدالتی فیصلہ حتمی ہوتا ہے۔ اسی فیصلے کے تحت آئینی عدالت نے ایک نجی بینک کو 17 سال قبل برطرف کیے گئے ڈیلی ویجز ڈرائیور محمد اکرم کو تمام سابقہ مراعات و فوائد کے ساتھ بحال کرنے کے لیبر کورٹ کے فیصلے پر فوری عملدرآمد کا حکم بھی جاری کیا ہے