وزیراعظم کی بجلی چوری کے خاتمے کیلئے سخت اقدامات کی ہدایت

وزیراعظم محمد شہباز شریف کی زیرِ صدارت پاور ڈویژن کا اعلیٰ سطحی جائزہ اجلاس منعقد ہوا جس میں پاور سیکٹر اصلاحات، سمارٹ میٹرز کی تنصیب اور بجلی چوری کے خاتمے کے لیے سخت اقدامات کا اعادہ کیا گیا۔ وزیراعظم نے تمام بجلی تقسیم کار کمپنیوں (DISCOs) کے بلنگ سسٹم کے ٹیکنیکل آڈٹ اور کارکردگی کی جانچ کے لیے KPIs متعین کرنے کی ہدایت کی، جبکہ دیہی علاقوں میں لوڈشیڈنگ سے نمٹنے کے لیے گاؤں کی سطح پر شمسی توانائی کے منصوبے تیار کرنے پر زور دیا۔ اجلاس کو بریفنگ میں بتایا گیا کہ مالی سال 2025-2026 میں آئیسکو (IESCO)، لیسکو (LESCO)، گیپکو (GEPCO)، فیسکو (FESCO) اور میپکو (MEPCO) نے 100% ریکوریاں حاصل کیں، جبکہ ٹرانسفارمر کی سطح پر ایسٹ پرفارمنس مینجمنٹ سسٹم (APMS) کا پہلا مرحلہ 30 ستمبر 2026 تک مکمل کر لیا جائے گا۔ اس کے علاوہ ملک کے مختلف ریجنز میں 16.2 ملین سنگل فیز اے ایم آئی (AMI) میٹرز لگانے کا منصوبہ بھی زیرِ غور ہے۔