کورونا کے بعد اب جان لیوا نیپا وائرس: خطرے کے پیشِ نظر سخت اسکریننگ کا آغاز

بھارت میں نیپا وائرس کے دو تصدیق شدہ کیسز سامنے آنے کے بعد پاکستان نے ملک میں داخل ہونے والے مسافروں کے لیے سخت صحت اسکریننگ اقدامات نافذ کر دیے ہیں، تاکہ وائرس کے ممکنہ پھیلاؤ کو روکا جا سکے۔

سرکاری حکام کے مطابق ملک کے تمام داخلی پوائنٹس، جن میں ہوائی اڈے، زمینی سرحدیں اور سمندری بندرگاہیں شامل ہیں، پر آنے والے ہر مسافر کی تھرمل اسکریننگ، طبی معائنہ اور گزشتہ 21 دنوں کی سفری تفصیلات حاصل کی جائیں گی۔ اس اقدام کا مقصد یہ یقینی بنانا ہے کہ کوئی بھی مسافر نیپا وائرس سے متاثرہ علاقوں سے بیماری لے کر ملک میں داخل نہ ہو۔

حکام کا کہنا ہے کہ پاکستان نے یہ احتیاطی اقدامات دیگر ایشیائی ممالک جیسے تھائی لینڈ، سنگاپور، ہانگ کانگ، ملائیشیا، انڈونیشیا اور ویتنام کی طرز پر اختیار کیے ہیں، جہاں ہوائی اڈوں پر صحت کے چیکس مزید سخت کر دیے گئے ہیں۔

ماہرین کے مطابق نیپا وائرس ایک انتہائی جان لیوا بیماری ہے، جس کی تاحال کوئی ویکسین دستیاب نہیں اور اس کی اموات کی شرح کافی زیادہ ہے۔ یہ وائرس عموماً پھلوں والے چمگادڑوں سے انسانوں میں منتقل ہوتا ہے اور بعض صورتوں میں محدود انسانی رابطے سے بھی پھیل سکتا ہے۔

دوسری جانب بھارتی حکام کا کہنا ہے کہ نیپا وائرس پر قابو پا لیا گیا ہے اور اب تک بڑے پیمانے پر اس کے پھیلاؤ کی اطلاعات نہیں ہیں۔ تاہم خطے کے دیگر ممالک احتیاطی تدابیر کے طور پر سخت نگرانی اور اسکریننگ کے اقدامات جاری رکھے ہوئے ہیں۔