یمنی مسلح افواج نے حوثی ملیشیا کے خلاف حملے شروع کر دیئے

یمن کی تسلیم شدہ حکومتی مسلح افواج نے باغی حوثی ملیشیا کے خلاف بڑے پیمانے پر کارروائیوں کا آغاز کرتے ہوئے دارالحکومت صنعا اور حوثیوں کے مضبوط گڑھ صعدہ میں ان کے اہم اور حساس ملٹری اہداف پر ہدف بنا کر حملے کیے ہیں۔ یمنی عسکری حکام کے مطابق ان کارروائیوں کا مقصد حوثی ملیشیا کے فوجی تحرک کو مفلوج کرنا اور ان کی جنگی صلاحیتوں کو شدید نقصان پہنچانا ہے۔ حملوں کے بعد صنعا اور صعدہ میں زور دار دھماکوں کی آوازیں سنی گئیں اور حوثی ٹھکانوں پر شدید تباہی کی اطلاعات ہیں۔

دوسری جانب یمنی ذرائع ابلاغ اور حوثی ذرائع نے دعویٰ کیا ہے کہ صنعا میں ہونے والی فضائی کارروائیوں میں سعودی عرب کی فضائیہ بھی شامل ہے، تاہم سعودی عرب کے حکام نے ان فضائی حملوں کی باضابطہ تصدیق نہیں کی ہے۔ یمنی مسلح افواج اور حوثی جنگجوؤں کے درمیان مختلف محاذوں پر شدید جھڑپیں اور گولا باری بلا تعطل جاری ہے، جس کے باعث خطے میں تناؤ مزید بڑھ گیا ہے۔