پی ٹی آئی خود کو دہشت گردی کی سہولت کار ثابت کر رہی ہے: گورنر کے پی

گورنر خیبرپختونخوا فیصل کریم کنڈی نے پاکستان تحریکِ انصاف (پی ٹی آئی) پر شدید تنقید کرتے ہوئے کہا ہے کہ پی ٹی آئی خود کو دہشت گردی کی سہولت کاری کرنے والی جماعت کے طور پر بے نقاب کر رہی ہے۔ سوشل میڈیا پلیٹ فارم ‘ایکس’ (سابق ٹوئٹر) پر جاری کردہ اپنے بیان میں گورنر خیبرپختونخوا نے کہا کہ پی ٹی آئی کے اقدامات اور بار بار کے سمجھوتوں سے یہ سنگین سوال اٹھتا ہے کہ آیا وہ صوبے میں دہشت گردوں کے آزادانہ آپریشنز کے لیے ماحول فراہم کر رہی ہے۔

فیصل کریم کنڈی نے کہا کہ خیبرپختونخوا حکومت نے دہشت گردی کے خلاف جنگ کی بنیادی ذمہ داری قبول کرنے کے بجائے سیکیورٹی وعدوں سے پیچھے ہٹنے کا راستہ اختیار کیا ہے، جو کہ ایک شرمناک اور بزدلانہ اقدام ہے۔ انہوں نے زور دیا کہ صوبائی حکومت کو اپنے شہریوں کے جانی و مالی تحفظ کو اولین ترجیح بنانا چاہیے تھا، تاہم سیکیورٹی جیسے حساس معاملے پر صوبائی حکومت کا حالیہ رویہ اور پسپائی انتہائی تشویشناک ہے۔