کے پی حکومت کے انسداد دہشتگردی کے طے ڈرافٹ پر دستخط سے انکار پر مذاکرات ناکام ہوئے: شیری رحمان

پاکستان پیپلز پارٹی (پی پی پی) کی سینئر رہنما اور سینیٹر شیری رحمان نے انکشاف کیا ہے کہ حکومت اور پی ٹی آئی کے درمیان چار مختلف ڈرافٹس پر تمام فریقین کا مکمل اتفاق ہو گیا تھا، تاہم خیبر پختونخوا حکومت کی جانب سے وفاق کے ساتھ انسدادِ دہشت گردی تعاون کے طے شدہ ڈرافٹ پر دستخط سے اچانک انکار کے باعث مذاکرات ناکام ہوئے۔ سوشل میڈیا پلیٹ فارم ‘ایکس’ پر جاری اپنے بیان میں سینیٹر شیری رحمان نے کہا کہ ہم نے بارہا زور دیا کہ خیبر پختونخوا حکومت اور پی ٹی آئی کی سینئر وفاقی قیادت بات چیت کے اس عمل میں براہِ راست شامل ہو، لیکن پشاور حکومت کا کوئی نمائندہ یا وزیراعلیٰ سامنے نہیں آیا؛ اگر ان کے پاس کوئی متبادل ڈرافٹ تھا تو انہیں خود بیٹھ کر پیش کرنا چاہیے تھا۔

شیری رحمان کا کہنا تھا کہ گزشتہ رات تمام تر نکات طے پا چکے تھے، لیکن رات ساڑھے آٹھ بجے کے بعد پشاور حکومت نے اچانک نئی شرائط رکھنا شروع کر دیں۔ انہوں نے افسوس کا اظہار کرتے ہوئے کہا کہ اپنے 25 سالہ پارلیمانی سفر میں انہوں نے اتنی اہم پیش رفت اور موقع ضائع ہوتے کبھی نہیں دیکھا، جس سے سالوں کی سیاسی تقسیم ختم کر کے ملک میں استحکام لایا جا سکتا تھا۔ انہوں نے اس صبر و تحامل پر وزیراعظم شہباز شریف، سپیکر ایاز صادق اور محسن نقوی کی کاوشوں کو سراہا اور واضح کیا کہ وفاق نے اپنی جانب سے مذاکرات کا دروازہ بند نہیں کیا بلکہ آخری وقت تک دوسری جانب کے واپس آنے کا انتظار کیا۔