پی ٹی آئی خیبرپختونخوا کی موجودہ قیادت تصادم چاہتی ہے: قمر زمان کائرہ

پاکستان پیپلز پارٹی (پی پی پی) کے سینئر رہنما قمر زمان کائرہ نے کہا ہے کہ خیبرپختونخوا میں پی ٹی آئی کی موجودہ قیادت دانستہ طور پر تصادم کی راہ اختیار کرنا چاہتی ہے۔ منڈی بہاؤالدین میں میڈیا سے گفتگو کرتے ہوئے انہوں نے کہا کہ شاید پی ٹی آئی کو لگتا ہے کہ تصادم ان کی سیاست کے مفاد میں ہے، حالانکہ دونوں فریقین کے درمیان کشیدگی کم کرنے کے لیے مذاکرات کو راستہ دینا ضروری ہے۔ انہوں نے انکشاف کیا کہ بات چیت کے دوران دونوں جانب سے نرمی دکھائی گئی، لیکن مذاکراتی عمل سے باہر موجود بعض پی ٹی آئی رہنماؤں کے رویے کے باعث ڈیڈلاک پیدا ہوا، جس سے حالات میں سدھار آتا دکھائی نہیں دے رہا۔

قمر زمان کائرہ نے متنبہ کیا کہ اگر تصادم کی صورتحال پیدا ہوئی تو ملک کا بڑا نقصان ہو سکتا ہے۔ ایک سوال کے جواب میں انہوں نے کہا کہ ایمرجنسی اور گورنر راج آئینی و قانونی اختیارات ضرور ہیں، لیکن یہ انتہائی ناپسندیدہ اقدامات ہیں۔ انہوں نے طنز کرتے ہوئے کہا کہ سابق وزیراعلیٰ علی امین گنڈاپور بھی لانگ مارچ کرتے رہے ہیں، مگر موجودہ وزیراعلیٰ کو شاید ان سے زیادہ شدت پسندی دکھانے کا ٹاسک ملا ہے۔ انہوں نے زور دیا کہ دو صوبے پہلے ہی دہشت گردی کا شکار ہیں، اس لیے اگر پی ٹی آئی کی ہٹ دھرمی سے مذاکرات ناکام ہوئے تو ریاست کو اپنا قانونی کام کرنا پڑے گا۔