کالعدم جوائنٹ عوامی ایکشن کمیٹی کی کال کشمیری عوام نے مسترد کر دی: طلال چودھری

وزیرِ مملکت برائے داخلہ طلال چوہدری نے میڈیا سے گفتگو کرتے ہوئے کہا ہے کہ آزاد کشمیر میں کالعدم جوائنٹ عوامی ایکشن کمیٹی کی احتجاجی کال کو کشمیری عوام نے مکمل طور پر مسترد کر دیا ہے۔ انہوں نے دعویٰ کیا کہ کالعدم جوائنٹ ایکشن کمیٹی اور پاکستان تحریکِ انصاف (پی ٹی آئی) کی پالیسیوں اور طریقۂ کار میں بہت سی قدریں مشترک ہیں، جبکہ انہوں نے احتجاج کی تاریخ بھی وہی منتخب کی جو پی ٹی آئی نے طے کر رکھی تھی۔ طلال چوہدری نے الزام عائد کیا کہ کالعدم تنظیم کے عناصر نے سیکیورٹی فورسز پر براہِ راست فائرنگ کی اور ملک میں بدامنی پھیلانے کے لیے افغانستان سمیت ہمسایہ ممالک سے اسلحہ آزاد کشمیر تک پہنچایا گیا۔

پریس کانفرنس کے دوران وزیرِ مملکت نے انکشاف کیا کہ سیکیورٹی فورسز نے ناجائز اسلحے سمیت ضیا نامی ایک ملزم کو گرفتار کیا ہے، جس کا رابطہ سردار امان نامی شخص سے ہوا تھا۔ طلال چوہدری نے پریس کانفرنس میں سردار امان کی ایک آڈیو ٹیپ بھی میڈیا کے سامنے چلائی اور واضح کیا کہ ریاست مخالف سرگرمیوں، ہتھیاروں کی اسمگلنگ اور سیکیورٹی فورسز پر حملوں سے متعلق تمام تر ثبوت جلد ہی قانون کے مطابق عدالت میں پیش کیے جائیں گے۔