ایرانی ایئر لائنز کی امریکی استثنیٰ ملنے کے بعد نجف کیلئے پروازیں بحال

امریکی انتظامیہ کی جانب سے عراق کو دی جانے والی خصوصی چھوٹ اور استثنیٰ کے بعد پابندیوں کا شکار ایرانی فضائی کمپنیوں نے عراق کے مقدس شہر نجف کے لیے اپنی پروازیں باقاعدہ بحال کر دی ہیں۔ اس استثنیٰ کے فوراً بعد ایران کی ‘کیسپین ایئرلائنز’ کی پہلی پرواز مقامی وقت کے مطابق شام 5 بج کر 15 منٹ پر نجف انٹرنیشنل ایئرپورٹ پر کامیابی سے اتر گئی۔

عراقی حکومت کے باضابطہ اعلان کے مطابق امریکا کے ساتھ طے پانے والے اس معاہدے کے تحت متنازع ‘ماہان ایئر’ کے علاوہ دیگر تمام ایرانی ایئرلائنز کو نجف کے روٹ پر روزانہ کی بنیاد پر 40 پروازیں آپریٹ کرنے کی اجازت ہوگی۔ اس پیش رفت سے ایران اور عراق کے درمیان زائرین کی نقل و حرکت اور فضائی رابطوں میں بڑی سہولت پیدا ہونے کی امید ہے۔