آذربائیجانی خاتون ڈیانا پاکستانی پولیس افسران کے ساتھ باکو روانہ

آذربائیجانی خاتون ڈیانا کو لاہور کے علامہ اقبال انٹرنیشنل ایئرپورٹ سے قومی ایئرلائن کی پرواز PK-159 کے ذریعے باکو روانہ کر دیا گیا ہے۔ ذرائع کے مطابق سفارت خانے کی خصوصی درخواست پر اے ایس پی ڈیفنس کی قیادت میں 3 پولیس افسران اور ایک خاتون اہلکار پر مشتمل ٹیم نے ان کی بورڈنگ مکمل کروائی اور حفاظت و نگہداشت کے تحت خاتون کے ہمراہ باکو روانہ ہوئے۔ روانگی تک خاتون ایئرپورٹ سیکیورٹی فورس (ASF) کی تحویل میں رہیں۔ یاد رہے کہ 2 روز قبل ڈیانا نے باکو جانے والی پرواز سے اتر کر اپنے ملک واپس جانے سے انکار کر دیا تھا، جس کے بعد سے وہ ایئرپورٹ پر موجود تھیں۔

متاثرہ غیر ملکی خاتون نے 29 ستمبر کو عدالت میں ریکارڈ کرائے گئے بیان میں موقف اختیار کیا تھا کہ پاکستان سفر کے دوران لاہور میں نمرہ اور مسکان نامی لڑکیوں کے ذریعے وہ ایک اپارٹمنٹ پہنچیں، جہاں محسن، احمد اور علی زین نامی ملزمان نے مبینہ طور پر انہیں یرغمال بنا کر اجتماعی زیادتی کا نشانہ بنایا، نقدی و موبائل فونز چھینے اور بعد میں گاڑی سے نیچے پھینک دیا۔ دوسری جانب کیس میں گرفتار ملزمان محسن اور علی زین نے عدالت میں زیادتی کے تمام الزامات کو مسترد کرتے ہوئے دعویٰ کیا ہے کہ خاتون اپنی مرضی سے ان کے فلیٹ پر آئی تھیں اور ان کے درمیان صرف رسمی گفتگو ہوئی تھی۔