ایران کی جانب سے پڑوسی ممالک پر حملوں کی مذمت کرتے ہیں، عاصم افتخار

اقوام متحدہ کی سیکورٹی کونسل کے اجلاس میں پاکستان نے خطے میں بڑھتی ہوئی کشیدگی پر تشویش کا اظہار کرتے ہوئے ایران کی جانب سے مختلف ممالک پر کیے گئے حملوں کی مذمت کی ہے۔

پاکستان کے مستقل مندوب عاصم افتخار احمد نے کہا کہ شہری علاقوں، تنصیبات اور اہم بنیادی ڈھانچے کو نشانہ بنانا قابلِ مذمت ہے اور اس طرح کی کارروائیاں خطے کے امن و استحکام کے لیے خطرہ بن رہی ہیں۔

انہوں نے کہا کہ پاکستان بحرین اور روس کی جانب سے پیش کی گئی قراردادوں کی حمایت کرتا ہے اور توقع رکھتا ہے کہ خطے میں حملے فوری طور پر بند ہوں گے جبکہ آبنائے ہرمز میں جہاز رانی کی آزادی کو بھی نقصان نہیں پہنچنا چاہیے۔

پاکستانی مندوب نے کہا کہ جاری کشیدگی کے اثرات پورے خطے تک پھیل رہے ہیں اور پاکستان بھی اس سے متاثر ہو رہا ہے، جس میں توانائی کی فراہمی اور فضائی روابط میں رکاوٹیں شامل ہیں۔

پاکستان نے سلامتی کونسل میں مطالبہ کیا کہ تمام فریق فوری طور پر جنگ بندی کریں اور مسئلے کے حل کے لیے مذاکرات اور سفارت کاری کا راستہ اختیار کریں۔