ٹرانسپورٹ کرایوں میں 15 فی صد اضافے کا اعلان

حکومت کی جانب سے پیٹرولیم مصنوعات کی قیمتوں میں حالیہ بھاری اضافے کے بعد پاکستان گڈز ٹرانسپورٹ الائنس نے مال بردار گاڑیوں (گڈز ٹرانسپورٹ) کے کرایوں میں فوری طور پر 15 فیصد اضافے کا اعلان کر دیا ہے۔ کراچی میں پریس کانفرنس کرتے ہوئے صدر پاکستان گڈز ٹرانسپورٹ الائنس ملک شہزاد اعوان نے حکومت سے ٹول ٹیکس، ود ہولڈنگ ٹیکس اور چالان ختم کرنے کا پُرزور مطالبہ کیا ہے۔ انہوں نے کہا کہ حکومتی پالیسیوں اور ٹرانسپورٹرز کو کوئی ریلیف نہ ملنے کے باعث لوگ اپنی گاڑیاں کھڑی کرنے پر مجبور ہو گئے ہیں۔ واضح رہے کہ حکومت نے پیٹرول کی قیمت میں 5 روپے 44 پیسے، ہائی اسپیڈ ڈیزل کی قیمت میں 31 روپے 5 پیسے اور مٹی کے تیل میں 34 روپے 33 پیسے فی لیٹر کا بڑا اضافہ کیا ہے، جس کے بعد پیٹرول کی نئی قیمت 316 روپے 15 پیسے، ڈیزل 354 روپے 35 پیسے اور مٹی کا تیل 276 روپے 66 پیسے فی لیٹر تک پہنچ گیا ہے۔ ٹرانسپورٹ رہنما نے پیٹرولیم مصنوعات کی مہنگائی کی شدید مذمت کرتے ہوئے اس شعبے کے لیے فوری حکومتی ریلیف کو ناگزیر قرار دیا ہے۔