مولانا کا بیان سمجھ سے بالاتر،فوج کی قربانیاں ناقابل فراموش ہیں: ملک احمد خان

اسپیکر پنجاب اسمبلی ملک محمد احمد خان نے کہا ہے کہ جمعیت علمائے اسلام کے سربراہ مولانا فضل الرحمان کا حالیہ بیان سمجھ سے بالاتر ہے۔ میر خلیل الرحمان سوسائٹی کے زیرِ اہتمام ’دہشت گردی کے سدباب کے لیے فوج کے کردار‘ کے موضوع پر منعقدہ سیمینار سے خطاب کرتے ہوئے انہوں نے یاد دلایا کہ ماضی میں پرویز مشرف کو باوردی صدر تسلیم کرانے کے لیے مولانا فضل الرحمان نے بھی ووٹ دیا تھا۔ ملک محمد احمد خان نے بانی پی ٹی آئی کو تنقید کا نشانہ بناتے ہوئے کہا کہ انہیں بھی فوج کا سیاسی کردار اس وقت تک مکمل قابلِ قبول تھا جب تک اس کے ذریعے انہیں حکومت مل رہی تھی، جبکہ اپنے دورِ اقتدار میں انہوں نے نیب کا بے دریغ استعمال کیا۔ انہوں نے مزید کہا کہ مولانا فضل الرحمان ان کے لیے انتہائی قابلِ احترام شخصیت ہیں، تاہم شہدا کے حوالے سے جوشِ خطابت میں شاید ان سے ایسے الفاظ ادا ہو گئے۔ سپیکر کا کہنا تھا کہ فوج کے سیاسی کردار پر تنقید اپنی جگہ، لیکن دہشت گردی کے خلاف جنگ میں پاک فوج نے بے مثال قربانیاں دی ہیں جنہیں نظرانداز نہیں کیا جا سکتا اور ریاستی اداروں کی ان قربانیوں کا اعتراف وقت کی اہم ضرورت ہے۔