ٹرمپ کا ایران کے خلاف وسیع فوجی آپریشن پر غور، درجنوں طیارے اسرائیل روانہ

امریکی نیوز ویب سائٹ ‘ایگزیوس’ نے انکشاف کیا ہے کہ صدر ڈونلڈ ٹرمپ ایران کے خلاف ایک وسیع فوجی آپریشن شروع کرنے پر سنجیدگی سے غور کر رہے ہیں، جس کے تحت درجنوں فضائی ایندھن بردار (ری فیولنگ) طیارے اسرائیل بھیجے جا رہے ہیں۔ رپورٹ کے مطابق، ٹرمپ انتظامیہ کے زیرِ غور منصوبوں میں ایران کے بجلی گھروں، اہم انفراسٹرکچر اور جوہری تنصیبات کو نشانہ بنانا شامل ہے تاکہ ایران پر دباؤ بڑھا کر آبنائے ہرمز کھلوائی جائے اور اسے جوہری مطالبات تسلیم کرنے پر مجبور کیا جا سکے۔ وائٹ ہاؤس کی ترجمان اینا کیلی کا کہنا ہے کہ صدر ٹرمپ نے امریکی سینٹرل کمانڈ کو ایرانی جارحیت روکنے اور اس کی حملے کرنے کی صلاحیت محدود کرنے کی ہدایت جاری کر دی ہے۔ دوسری جانب، ایران کی پاسدارانِ انقلاب نے سخت ردعمل دیتے ہوئے امریکی فوجی اڈے رکھنے والے پڑوسی ممالک کو خبردار کیا ہے کہ اگر ان کی سرزمین ایران کے خلاف استعمال ہوئی تو وہ مناسب جواب کے لیے تیار رہیں اور اپنے شہریوں کو ممکنہ فوجی اہداف سے دور رکھیں۔