پٹرول، ڈیزل اور مٹی کے تیل پر لیوی برقرار، نوٹیفکیشن جاری

پٹرولیم ڈویژن نے پیٹرول، ڈیزل اور مٹی کے تیل پر لیوی برقرار رکھنے کا باضابطہ نوٹیفکیشن جاری کر دیا ہے، جس کے تحت پیٹرول پر 80 روپے، ڈیزل پر 70 روپے 82 پیسے اور مٹی کے تیل پر 20 روپے 36 پیسے فی لیٹر لیوی برقرار رہے گی۔ واضح رہے کہ حکومت کی جانب سے پیٹرولیم مصنوعات کی قیمتوں کا تعین روزانہ کی بنیاد پر کرنے کے اعلان کے بعد ابتدائی 3 روز کے لیے قیمتوں میں بھاری اضافے کا اعلان کیا گیا ہے۔ نوٹیفکیشن کے مطابق، ڈیزل کی قیمت میں 31 روپے 5 پیسے فی لیٹر کا بڑا اضافہ کیا گیا ہے جس کے بعد اس کی نئی قیمت 354 روپے 35 پیسے ہو گئی ہے۔ اسی طرح پیٹرول کی قیمت میں 5 روپے 44 پیسے فی لیٹر اضافے سے نئی قیمت 316 روپے 15 پیسے مقرر کی گئی ہے۔ علاوہ ازیں، مٹی کا تیل بھی 34 روپے 33 پیسے فی لیٹر مہنگا کر دیا گیا ہے، جس کے بعد اس کی قیمت 242 روپے 33 پیسے سے بڑھ کر 276 روپے 66 پیسے فی لیٹر کی سطح پر پہنچ گئی ہے