نورین نیازی کا فوج کے خلاف متنازعہ بیان، سیاسی حلقوں کا شدید ردِعمل

بانی پی ٹی آئی کی بہن نورین نیازی کے ایک یوٹیوب انٹرویو میں دیے گئے بیانات پر سیاسی اور عوامی حلقوں میں شدید بحث چھڑ گئی ہے۔ انٹرویو کے دوران انہوں نے پاک فوج، معرکۂ حق اور بھارت سے متعلق متعدد سنگین دعوے کیے، جن میں انہوں نے الزام عائد کیا کہ معرکۂ حق افواجِ پاکستان اور بھارتی وزیراعظم نریندر مودی کے درمیان مبینہ گٹھ جوڑ کا نتیجہ تھا۔ انہوں نے یہ دعویٰ بھی کیا کہ بھارت نے اسرائیل کے کہنے پر پاکستان پر حملہ نہیں کیا کیونکہ پاکستان اسرائیل کو تسلیم کرنے جا رہا تھا۔ اس پر ردعمل دیتے ہوئے سیاسی تجزیہ کاروں اور ماہرین کا کہنا ہے کہ بانی پی ٹی آئی کی بہن نے ذاتی مفادات کے لیے سرخ لائن عبور کی ہے اور یہ غیر ذمہ دارانہ بیانات قومی بیانیے کو نقصان پہنچانے کے ساتھ ساتھ بھارتی میڈیا یا پاکستان مخالف قوتوں کے ہاتھوں استعمال ہو سکتے ہیں۔ ماہرین کے مطابق یہ بیان پی ٹی آئی کے اس بیانیے کی اصلیت کو بھی بے نقاب کرتا ہے کہ یہ فوج ان کی ہے۔ واضح رہے کہ اس شدید ردعمل پر اب تک نورین نیازی یا پاکستان تحریکِ انصاف کی جانب سے کوئی باضابطہ وضاحت سامنے نہیں آئی ہے۔