پاکستان میں دھکے کے بغیر کوئی چیز نہیں چلتی: خواجہ آصف

وزیر دفاع خواجہ محمد آصف نے کہا ہے کہ پاکستان میں دھکے کے بغیر کوئی چیز نہیں چلتی، ملک کو آگے بڑھانے کے لیے سیاست دانوں اور انتظامیہ کو مل کر کام کرنا ہو گا۔ سیالکوٹ میں میڈیا سے گفتگو کرتے ہوئے انہوں نے اہم انفراسٹرکچر منصوبوں پر روشنی ڈالی اور بتایا کہ کھاریاں سے راولپنڈی موٹروے منصوبے کا تقریباً 205 ارب روپے کا ٹھیکہ فرنٹیئر ورکس آرگنائزیشن (FWO) کو دیا جا چکا ہے، جبکہ دریائے چناب پر پل کی تعمیر بھی آخری مراحل میں ہے۔ خواجہ آصف کا کہنا تھا کہ سیالکوٹ رنگ روڈ کے پہلے مرحلے پر جلد کام شروع ہوگا جو وزیرآباد روڈ، ڈسکہ روڈ، پسرور روڈ اور کشمیر روڈ کو آپس میں منسلک کرے گا۔ انہوں نے مالی دباؤ کے باوجود فنڈز کی فراہمی پر وزیراعلیٰ پنجاب مریم نواز، وزیراعظم اور عسکری قیادت کا شکریہ ادا کرتے ہوئے کہا کہ ماضی میں سابق وزیراعظم میاں نواز شریف نے شہر کو موٹروے سے جوڑ کر اس کی محرومی کا ازالہ کیا تھا، اور اب یہ نئے منصوبے سیالکوٹ کی معاشی اور برآمدی اہمیت میں انقلابی تبدیلی لائیں گے۔