ملک کے کئی شہروں میں شدید گرمی کا الرٹ، ہیٹ سٹروک کا خدشہ

محکمہ موسمیات نے ملک کے مختلف حصوں میں شدید گرمی کی لہر اور ہیٹ اسٹروک کے بڑھتے ہوئے خطرے کے پیشِ نظر باقاعدہ الرٹ جاری کر دیا ہے۔ تازہ ترین رپورٹ کے مطابق پشاور، کوئٹہ، بہاولنگر، ڈی آئی خان اور جوہرآباد میں اصل درجہ حرارت 40 سے 42 ڈگری سینٹی گریڈ ریکارڈ کیا گیا، تاہم نمی کے باعث ان شہروں میں ہیٹ انڈیکس یعنی محسوس درجہ حرارت 54 ڈگری سے بھی زائد محسوس کیا جا رہا ہے۔ اسی طرح سرگودھا میں درجہ حرارت 40.5 ڈگری جبکہ محسوس درجہ حرارت 52.8 ڈگری تک پہنچ گیا ہے، اور گوجرانوالہ و کوٹ ادو میں بھی محسوس درجہ حرارت 52.5 ڈگری ریکارڈ کیا گیا ہے۔ اوکاڑہ میں ہیٹ انڈیکس 51.5 ڈگری، اٹک میں 49.8 ڈگری، اسلام آباد میں 49.2 ڈگری اور فیصل آباد میں 48.3 ڈگری محسوس کیا گیا۔ مزید برآں، سیالکوٹ میں درجہ حرارت 36 ڈگری اور نمی کا تناسب 58 فیصد رہا، جبکہ حیدرآباد میں محسوس درجہ حرارت 45.9 ڈگری اور کراچی میں 38.1 ڈگری ریکارڈ کیا گیا۔ محکمہ موسمیات نے خبردار کیا ہے کہ اس قدر زیادہ ہیٹ انڈیکس کے باعث ہیٹ اسٹروک کا شدید خطرہ ہے، اس لیے عوام اور متعلقہ ادارے فوری طور پر احتیاطی تدابیر اختیار کریں۔