سوات میں گلیشیئر پھٹ گیا، تین کوہ پیما زخمی، ایک لاپتا

سوات کے سیاحتی علاقے کالام کی وادی مٹلتان میں ایک بڑا گلیشیئر پھٹ گیا، جس کی زد میں آکر 7 کوہ پیما شدید متاثر ہوئے ہیں۔ ریسکیو ذرائع کے مطابق، یہ کوہ پیما ‘چھوٹا کے ٹو’ کے بیس کیمپ کی طرف جا رہے تھے کہ راستے میں یہ حادثہ پیش آیا۔ واقعے کے نتیجے میں راولپنڈی سے تعلق رکھنے والے 3 کوہ پیما شدید زخمی ہوئے، جنہیں ضلعی ایمرجنسی افسر سید شعیب منصور کی ہدایت پر موقع پر پہنچنے والی ریسکیو ٹیموں نے ابتدائی طبی امداد دینے کے بعد سیدو شریف اسپتال منتقل کر دیا ہے۔ ریسکیو حکام کا کہنا ہے کہ حادثہ انتہائی دور افتادہ اور دشوار گزار پہاڑی علاقے میں پیش آنے کے باعث امدادی کارروائیوں میں شدید مشکلات کا سامنا ہے، جبکہ خوازہ خیلہ سے تعلق رکھنے والے لاپتا کوہ پیما سید علی شاہ کی تلاش کے لیے سرچ آپریشن تاحال جاری ہے۔