اپوزیشن نے حکومت سے مذاکرات کے لیے کوئی شرط نہیں رکھی، بات آئین اور قانون کی بالادستی پر ہوگی: مصطفیٰ نواز کھوکھر

تحریک تحفظ آئین پاکستان کے رہنما مصطفیٰ نواز کھوکھر نے حکومت سے مذاکرات کے لیے کسی قسم کی شرط رکھنے سے متعلق خبروں کو مسترد کرتے ہوئے واضح کیا ہے کہ اپوزیشن نے مذاکرات کے لیے کوئی شرط عائد نہیں کی۔

مصطفیٰ نواز کھوکھر کا کہنا تھا کہ اپوزیشن پارلیمان کی بالادستی اور قانون کی حکمرانی جیسے بنیادی اصولوں پر بات چیت کرنا چاہتی ہے۔ انہوں نے بتایا کہ وزیراعظم شہباز شریف کی جانب سے مذاکرات کی پیشکش پر اتحادی جماعتوں سے مشاورت کی جاچکی ہے۔

ان کا کہنا تھا کہ اس وقت ملک شدید سیاسی اور معاشی بحران سے گزر رہا ہے اور جمہوری نظام میں دروازے بند نہیں کیے جانے چاہییں بلکہ مکالمے کے ذریعے مسائل کا حل نکالنا ضروری ہے۔

دوسری جانب پاکستان تحریک انصاف کے رہنما اسد قیصر نے کہا کہ یہ تاثر دیا جاتا ہے کہ اپوزیشن بات چیت سے گریزاں ہے، تاہم انہوں نے واضح کیا کہ اپوزیشن نے بغیر کسی شرط کے آئین کی بالادستی، قانون کی حکمرانی اور عوام کے ووٹ کو تسلیم کرنے کا ایجنڈا پیش کیا ہے۔

اسد قیصر کا کہنا تھا کہ اب سب سے پہلے حکومت کی سنجیدگی کو پرکھا جائے گا اور دیکھا جائے گا کہ اس پیشکش پر حکومت کا ردِعمل کیا آتا ہے۔

ادھر جمعیت علمائے اسلام (ف) کے سربراہ مولانا فضل الرحمان نے حکومت اور اپوزیشن کے درمیان مذاکرات پر آمادگی کو ایک مثبت پیش رفت قرار دیتے ہوئے اسے سیاسی استحکام کی جانب اہم قدم کہا ہے۔