شمالی کوریا کا امریکا، جاپان اور جنوبی کوریا پر خطے میں کشیدگی بڑھانے کا الزام

شمالی کوریا کے سرکاری خبر رساں ادارے (KCNA) کی رپورٹ کے مطابق پیانگ یانگ نے امریکا، جاپان اور جنوبی کوریا کے بڑھتے ہوئے عسکری تعاون کو ایشیا پیسیفک خطے کے لیے “نیا سیکیورٹی بحران” قرار دیتے ہوئے شدید خبردار کیا ہے۔ عسکری تجزیہ کار کی تحریر میں امریکی قیادت میں انعقاد پذیر دنیا کی سب سے بڑی بحری مشق ‘رم پیک’ (RIMPAC) پر تنقید کرتے ہوئے بتایا گیا کہ اس میں 30 ہزار سے زائد اہلکاروں، 30 سے زائد جنگی جہازوں، 05 آبدوزوں اور تقریباً 190 طیاروں نے حصہ لیا، جسے شمالی کوریا نے “جارحیت کی پیشگی مشق” قرار دیا۔ پیانگ یانگ نے متنبہ کیا کہ وہ “نئی سطح کے خطرے کا جواب نئی سطح کی دفاعی صلاحیت” سے دے گا۔ دوسری جانب شمالی کوریا کی وزارتِ خارجہ نے 11 مغربی ممالک کی جانب سے عائد کردہ سائبر خطرات کے الزامات کو بے بنیاد اور سیاسی قرار دے کر مسترد کرتے ہوئے الٹا امریکا پر سائبر اسپیس کی عسکریت پسندی کا الزام عائد کیا ہے۔