فیلڈ مارشل کا این ڈی ایم اے ہیڈکوارٹرز کا دورہ، مون سون آفات سے نمٹنے کی تیاریوں کا جائزہ

آرمی چیف جنرل سید عاصم منیر نے نیشنل ایمرجنسیز آپریشن سینٹر (NEOC) ہیڈ کوارٹرز کا اہم دورہ کیا، جہاں انہیں مون سون سیزن کے دوران ممکنہ قدرتی آفات سے نمٹنے کے لیے کیے گئے پیشگی انتظامات پر تفصیلی بریفنگ دی گئی۔ پاک فوج کے شعبۂ تعلقات عامہ (ISPR) کے مطابق چیئرمین نیشنل ڈیزاسٹر مینجمنٹ اتھارٹی (NDMA) نے آرمی چیف کو نیشنل ایمرجنسیز آپریشن سینٹر کی آپریشنل صلاحیتوں، خودکار نگرانی کے نظام اور ہنگامی صورتحال سے نمٹنے کی حکمتِ عملی سے آگاہ کیا۔ آرمی چیف نے قدرتی آفات سے نمٹنے کی قومی صلاحیت کو مضبوط بنانے کے لیے NDMA کی کاوشوں کو سراہا اور انسانی جانوں و قومی انفراسٹرکچر کے تحفظ کے لیے مؤثر ادارہ جاتی رابطہ کاری کی ہدایت کی۔ ان کا کہنا تھا کہ پاکستان کی مسلح افواج قدرتی آفات کے دوران ریلیف، ریسکیو اور بحالی کی سرگرمیوں میں سول انتظامیہ کی مکمل معاونت کے لیے الرٹ ہیں۔